Manqabat,qaseeda,qasida,nazm,imam e zamana as,imam e asr,hujjate aakhir akhir,muntazar,in urdu,

                                       
                    🌼🌼🌼🌼🌼🌼🌼🌼🌼
                      نظر رکھتاہے سب پر باغباں
                           پردے کے پیچھے سے




منور ہیں نجوم و کہکشاں پردے کے پیچھے سے
کوئی تھامے ہے باگ کن فکاں پردے کے پیچھے سے

کوئی طاقت ہے جو ، سر پر ہمیں محسوس ہوتی ہے
کوئی گردوں ہے ، جو ہے سائباں پردے کے پیچھے سے

سفر کرتی ہیں جس کی نکہتیں اس پورے عالم میں
کھلاہے ایک ایسا گلستاں پردے کے پیچھے سے

کسی کے بس میں گر ہوتا انھیں کب کا مٹا دیتا
شعائر کا ہے کوئی پاسباں پردے کے پیچھے سے

نمازیں ہورہی ہیں اس لئے اب تک زمانے میں
امامِ وقت ہے محوِ اذاں پردے کے پیچھے سے

چمن میں کونسی کلیوں پہ کیا حالت گذرتی ہے
نظر رکھتاہے سب پر باغباں پردے کے پیچھے سے

ہمارے اتنے دشمن ہیں کہ ہم زندہ نہ رہ پائیں
اگر ہم پر نہ ہوں وہ مہرباں پردے کے پیچھے سے

قدم جب لڑ کھڑاتے ہیں سفر میں زندگانی کے
ہمیں ملتی ہے اک تاب و تواں پردے کے پیچھے سے

ذرا دیکھیں وہاں پر علم کی کیسی بہاریں ہیں
دکھادیں ! ہمکو اپنا آستاں پردے کے پیچھے سے

کسے کتنی ضرورت ہے امامِ وقت کی اپنے
ہمارا ہورہاہے امتحاں پردے کے پیچھے سے

محبت ہے وفا ہے دین ہے قرآن ہے جس میں
سنبھالے ہے کوئی یہ کارواں پردے کے پیچھے سے

انھیں جس وقت بھی کوئی مصیبت گھیر لیتی ہے
مدد لیتےہیں ارض و آسماں پردے کے پیچھے سے

بظاھر آنکھ سے اوجھل ہے جان مصطفیٰ اپنی
مرادیں ! پارہے ہیں انس و جاں پردے کے پیچھے سے

خیال و فکر بھی اس سے مرے انجان رہتےہیں
مجھے دیتاہے ایسے لامکاں پردے کے پیچھے سے

یہ باتیں کیف ہونٹوں پر ترے یوں ہی نہیں آئیں
کوئی ہے اس سخن کا ترجماں پردے کے پیچھے سے






🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸

🌺اللھم صل علی محمد وآل محمد وعجل فرجھم والعن اعدائھم اجمعین

🖊  رضی حیدر کیف

🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸