Manqabat,qaseeda,qasida,nazm,dar bara e qur'aan,Quran,in urdu,

                          قرآن اہلِ علم سے بس

                                   ہم کلام ہے

قرآن ایک کافی وشافی کلام ہے

 واحد کتاب ہے جسے حاصل دوام ہے

 ہونٹوں پہ جس کے اس کی تلاوت کا جام ہے

 دونوں جہاں کا اس پہ درود و سلام ہے

 اس میں جو عیب ڈھونڈے وہی عیب دار ہے

 قرآن اک حکیم کا روشن پیام ہے

 چہ جائیکہ مٹا ۓ کوئی اس کی آیتیں

 اس کے تو زیرو پیش کا بھی احترام ہے

 قرآں میں جا بجا ہیں تدبر کی دعوتیں

 قرآن اہلِ علم سے بس ہم کلام ہے 

ہے حرف حرف اس کا بلاغت کا اک جہاں 

نہجِ بلاغہ اسکی صراحت کا نام ہے

تریاق ہر زہر کا ہے اسکے بیان میں 

اس پر خدا کی بخششوں کا اختتام ہے

ہر چیز اس کے پاس ہے ، یہ جس کے پاس ہے 

یہ مخزنِ علوم ہے خیرِ تمام ہے

 مجموعہ ہے یہ ضابطہِ کردگار کا

اسمیں حیاتِ فانی کا کامل نظام ہے 

یہ خوش کلام جس کی طبیعت میں ڈھل گیا

وہ کوئی بھی ہو ، آج علیہ السلام ہے  

کافی ہے اتنا کہنا کسی شخص کے لئے

یہ جامع الکلام خدا کا کلام ہے 

ڈھونڈ اسمیں کیف اپنی ہدایت کا راستہ 

قرآن تیرا مرجع ہے تیرا امام ہے

🖊️ رضی حیدر کیف