عبادتوں کے چمن کی بہار ہے رمضاں
علاجِ گردشِ لیل و نہار ہے رمضاں
پۓ طہارتِ دل آبشار ہے رمضا
پیامِ رحمتِ پروردگار ہے رمضاں
ہوا کریم کا احساں اسی مہینے میں
ملا رسول کو قرآں اسی مہینے میں
================================
بہارِ گلشنِ عشق و وفا کا موسم ہے
نمودِ قوّتِ صبر و رضا کا موسم ہے
فروغِ جذبۂ صدق و صفا کا موسم ہے
عبادتوں کا زمانہ دعا کا موسم ہے
ہے وقت بگڑی ہوئی قسمتیں بنانے کا
زمانہ آیا گناہوں کے بخشوانے کا
================================
زہے نصیب جو ماہِ صیام آتا ہے
زمیں پہ اہلِ فلک کا سلام آتا ہے
جو پیاسے ہونٹوں پہ مالک کا نام آتا ہے
تو خود ہی رقص میں رحمت کا جام آتا ہے
سنا دو خوش خبری درد و غم کے ماروں کو
ملی ہے مہلتِ توبہ گناہ گاروں کو
================================
زہے وہ ضعف جو کردار کی دوا بن جائے
خوشا وہ پیاس جو سیرابیِ وفا بن جائے
زہے وہ بھوک جو دل کیلئے دوا بن جائے
خوشا وہ نیند جو تسبیحِ کبریا بن جائے
اسی کو حق ہے کہ دستِ دعا بلند کرے
کہ جس کی بوئے دہن بھی خدا پسند کرے
================================
ہر ایک سانس میں ذکرِ خدا کی لذّت ہے
ہر اک نَفَس میں نِہاں جلوۂ تلاوت ہے
یہ ترکِ آب و غذا زندگی کی دولت ہے
جو نیند آئے تو سونا بھی اک عبادت ہے
نزولِ رحمتِ پروردگار ہوتا ہے
کہ بخت جاگتا ہے روزہ دار سوتا ہے
================================
وہ شامِ قدر کا منظر نمازیوں کی قطار
دعائے سیدِ سجاؑد کی وہ نرم پھُوار
پلک پہ اشکِ ندامت زباں پہ استغفار
وہ رات جس کی تجلّی پہ لاکھ صبح نثار
بہت بلند حدِ امتحان دیکھتے ہیں
مَلَک بھی آ کے عبادت کی شان دیکھتے ہیں
================================
سنائی ہے لبِ معصوم نے خبر اس کی
صدائے " فُزتُ بِرَبْ " ہے پیامبر اس کی
علؑی کے سجدوں سے روشن ہے رہگذر اس کی
پیامِ فتح ہے انّیسویں سحر اس کی
وقار کیوں نہ ہو ہر ایک بوُ ترابی کا
یہی مہینہ ہے مولؑا کی کامیابی کا
================================
بھُلا دیں فرض کو چھوٹے بڑے، خدا نہ کرے
دلوں پہ کفر کا پنجہ گڑے، خدا نہ کرے
دکھائی دیں ہمیں روزے کڑے، خدا نہ کرے
خدا کے سامنے کہنا پڑے، خدا نہ کرے
جو داغ دامنِ کردار پر تھے دھو نہ سکے
گزر گیا رمَضاں فیض یاب ہو نہ سکے
================================
*پیام اعظمی*
*ماخوذ از والقلم*
Comments
Post a Comment